Albert Pahl – en Naroop
Albert Pahl
Foto: H.J. Rickert (Quelle: Jahrbuch SPO 2010)
He hett veel daan för sien Heimat, de Halfinsel Eiderstedt, un för de ganze Kreis Noordfreesland – an veel verscheden Steden un in verscheden Positschonen. As Nafolger vun Hans-Alwin Ketels weer Albert Pahl (1937-2024) 18 Johr lang Vörsitter vun de Heimatbund Landschaft Eiderstedt, ümmer in enge Tosamenarbeit mit de Geschäftsföhrers – eerst Claus Heitmann, dorna Hauke Koopmann. All de Themen rundum de Heimat weren em wichtig, ganz besünners ok de plattdüütsche Spraak. Ümmer denn, wenn dat passen kunn, hett he sien Reden un Anspraken op Platt holen – un dat hett egentlich keen Momang geven, wo dat nich passt hett.
In sien Amtstiet is de Heimatbund vun de Geschäftssteed in Taten hen na Gaarn in’t Ole Raathuus flütt – merrn op de Halfinsel hett dat ok veel beter passt, un dat passt ok vundaag noch allerbest. As Ehrenvörsitter weer he de Heimatbund verbunnen bet toletzt. Noch in düssen Sommer weer he in Gaarn in de Stadtpark dorbi, as de Heimatbund Jubiläum fiert hett un op 111 Johr Arbeit för de Heimat torüchkieken kunn. Mit veel Intresse keek he sik dat Programm an un weer heel tofreden, as na de engelschen Leder ok noch wat Plattdüütsches keem.
De Heimatbund Landschaft Eiderstedt truert um Albert Pahl un denkt dankbor an sien Warken för Eiderstedt torüch.
Hans Meeder, 1. Vörsitter
